Rumpaka Rajah

Pun sampun amitan ampun

ka luhur ka Sang Rumuhun

ka handap ka Sang Batara

Sang Batara Sang Batari

Sang Batara Nagaraja

Sang Batari Nagaumpi

 

Ka luhur ka nu mayungan

ka handap ka nu ngamparan

jisim tanpa isim-isim

neda agung nya paralun

 

Ka luhur ka Sunan Ibu

ka Sang Ratu Payung Agung

ka handap ka Sunan Rama

ka Guru Putra Hyang Bayu

 

Sang Kolépat Herang ngaraning menyan

Sang Embut Putih ngaraning haseup

sukma nu dikukusan

sukma nu dikukusan

 

Neda agung nya paralun

neda panjang pangampura

pun sampun amitan ampun

 

Reuwas ku impian kuring

bisi ditagih jurig saketi

ngahutang anu salaksa

nagihna sok susungkunan

ngedukkeun nu jadi hojah

mancokeun hujan jeung getih

kuyupuk jadi halimun

kayapak jadi sagara

 

Ditulak ku rajah pamutah

pangmutahkeun lembur ieu

ti hilir kutana beusi

ti wétan kutana waja

ti kidul kutana wulung

ti kalér kutana inten

lain kuta bagja

tapi kuta panday

……

 

Neda agung nya paralun

neda panjang pangampura

pun sampun amitan ampun

 

Kasemuran kasemaran

kasemaran Nabi Adam

kasemuran Nabi Daud

 

Notog ka Gunung Koromong

énggal ka Pandita Gunung Padang

bray caang neda padang

caang dina tungtung ati

dukun lebus paraji sakti

nu séda waruga jagat

ninggang nusa tigang puluh tiga

bangawan sawidak lima

neda agung nya paralun

neda panjang pangampura

 

Punika Surat Sangakeling

meunang nulis poé Jumaah

opat belas bulan Mulud

utusan putra jungjunan

ombaklarang Jaketra

putra Radén Kanduruan

jurutulis Pajajaran

 

Ratu Suluk Raja Mekah

kusumaning Nusa Jawa

putra Prabu Siliwangi

tanggalna iman Islam

 

 

Astagpirullah hal’adzim 3 x

inal hérang inal lénggang

bumi langit acan ngajadi

manusa acan aya kakara Alah Taala

 

Buyut Gahung Ratu Gahung

nu ngawindu di buana pancatengah

cupu disampun manik

datang manik astagina

Nu ngageugeuh di Gunung Halimun

Buyut Eundeur Buyut Eur-eur

Buyut Timbang Ajirarang

nu nanggeuy Aji Rajah Pakuan

 

Neda agung nya paralun

neda panjang pangampura

Astagpirullah hal’adzim 3 x

 

Punika Rajah Pamunah

munah kayu munah batu

dipunah ku rajah pamunah

munah lemah katut imah

dipunah ku rajah pamunah

punah kayu katut batu

dipunah ku rajah pamunah

punah ku sajagat kabéh

punah ku sajagat kabéh

punah, punah, punah

ku sajagat kabéh

 

Punika Rajah Pamunah

bayu mada, bayu madi, bayu waras

tunggal kulit, tunggal dagingning déwata

bisina sumping ti peuting datang ti beurang

bayu mada bayu madi bayu waras

tunggal kulit tunggal dagingning déwata

 

Ulah matak jadi mandawa kana badan

ulah matak jadi mandawi kana diri

bisi aya jurig nyiliwuri

setan marakayangan

kelong néwo-néwo

 

ti cai geusan mandi

ti darat geusan pileumpangan

teu wana, teu wani, teu wawuh

 

 

 

Astagpirullah hal’adzim 2 x

opat puluh kali

astagpirulah hal’adzim

 

Muncuk ka Sang Ratu Galuh

munday ka Kéan Santang

Sang Lumajéng Buanahérang

pangupatkeun pangupatkeun pangépéskeun

 

 

Bisi aya jurig nyiliwuri

sétan marakayangan

kélong néwo-néwo

ti cai geusan mandi

ti darat geusan pileumpangan

 

Muncuk ka Sang Ratu Galuh

munday ka Kean Santang

Sang Lumajéng Buanahérang

pangupatkeun pangupatkeun pangépéskeun

ka putra ka leuwisésa

ka putra ka leuwigedé

terusna ka Cihaliwung

mapayna ka Cisadané

 

Cihaliwung nunjang ngidul

Cisadané nunjang ngalér

pangrumbayan rambut panjang

paragi nu geulis mandi

paragi nu éndah ngala

ngala …

ditingalan nu ngahyang

astagpirullah hal’adzim

 

 

Cah hérang bermana putih

panyipuhan pangaweruh

panyiraman pangabisa

dumeling ka Kanjeng Nabi

cacap kersaning Alloh

lailahaileloh

Muhamadarosululoh

 

Huripna ti Gusti

warasna ti Allah

dat sipat mujizat

kersaning Allah

Alloh sajatining hurip

Alloh sajatining hirup

neda agung nya paralun

Astagpirullah hal’adzim 2 x

 

Bayu suci badan sampurna

kuliat kersaning Alloh

lailahaileloh

Muhamadarosululoh

 

Dat siro asmaning eroh

dat siro asmaning eroh

Alohumma wujud tunggal

sabangsa alékumsalam

asup nu agung bangsa manusa

 

Nu nampana Rosululoh

aci rasaning gampang

aci asmaning gampang

 

Astagpirullah hal’adzim 3 x

Astagpirullah hal’adzim

 

 

 

 

::

Rumpaka Rajah

Pantun Abah Akis

Désa Baros Kacamatan Arjasari

Kabupatén Bandung

 

2005

 

Published in: on 4 Desember 2010 at 8:14 am  Tinggalkan sebuah Komentar  

The URI to TrackBack this entry is: https://ncepborneo.wordpress.com/2010/12/04/rumpaka-rajah/trackback/

RSS feed for comments on this post.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: